– Røyrfaget er i rivande utvikling, og vi må tenkje nytt for å auke tilgangen på faglært arbeidskraft i faget, seier leiar for område Nord i Byggopp Vestland, Håkon Svoen. Han er sjølv utdanna røyrleggjar og har bakgrunn frå skuleverket. – Det er stor trong for kompetanse på røyr i anleggsprosjekt, og Steffen skal få fylgje av fleire, lover han.

Kort fortalt jobbar ein anleggsrøyrleggjar med å lage og halde ved like infrastruktur for vatn, avløp og overvann i eit anlegg. Faget er breitt, der ein jobbar med alt frå grøfting til masseoppbygging, vatn-kjemi og trykkprøver. I læretida var Steffen til dømes med på å bygge infrastruktur for Sunnfjord kommune, i form av eit nytt vass- og kloakksystem frå Farsund til Mo, med nytt høgdebasseng.

Viktig med fagleg spisskompetanse

Steffen Skjærli tok vg1 Bygg- og anleggsteknikk på Øyrane vidaregåande skule og vg 2 Klima, energi og miljøteknikk på Flora vidaregåande skule, og starta som lærling i røyrfaget i Mesta i 2017. På den tida fantes ikkje tilbodet om fagutdanning som anleggsrøyrleggjar. – Men då Håkon fortalde om planane for den nye utdanninga, hoppa eg på så fort eg kunne, seier han.

– No har vi fått på plass ei fireårig utdanning i anleggsrøyrfaget. Det vil profesjonalisere faget og auke kvaliteten på arbeidet. Fagleg spisskompetanse gir betre løysingar, understrekar Håkon Svoen

«Entusiastisk, nøyaktig og effektiv»

Fram til Steffen fekk det andre fagbrevet sitt i januar i år var han ein av om lag 480 lærlingar med opplæringskontrakt i Byggopp Vestland. Dei har kontor i Bergen og Førde med i alt tolv tilsette. Planen er å utvide med fleire kontor i fylket, for å auke rekrutteringa og gi lærlingane enda betre oppfylgjing.

Håkon Svoen seier at Steffen Skjærli har vore ein «mønsterlærling». Det fekk 23-åringen prov for i samband med kåringa av «Årets lærling» i bygg- og anleggsbransjen i Vestland i 2022, der Steffen vart kåra til ein av vinnarane. I grunngjevinga frå arbeidsgjevaren vart det mellom anna peika på at «han er entusiastisk til arbeidsoppgåvene, og ynskjer alltid å vere nøyaktig, effektiv og levere god kvalitet».

No har han lagt ei lang læretid bak seg, og satsar på mange gode år som fagarbeidar på anlegg